შეიარაღებული ძალების მეოთხე ბრიგადაში, კერძოდ 42-ე ბატალიონში მომხდარი ინციდენტის შესახებ გავრცელებულ ინფორმაციაზე თავდაცვის სამინისტროს კომენტარი ამ დრომდე არ გაუკეთებია. საქმე ეხება ჯარისკაცების ცემას.

ინფორმაციის გადამოწმება ჯერ ვერ ხერხდება ვერც სახალხო დამცველთან. "ინტერპრესნიუსის" კორესპოდენტი ვაზიანის სამხედრო ბაზაზე მდებარე ტერიტორიაზე უკვე იმყოფებოდა.

მისი ინფორმაციით, ბაზასთან მისულები იყვნენ ერთ-ერთი ჯარისკაცის ახლობლები და ოჯახის წევრები.
როგორც ჯარისკაცის დედამ "ინტერპრესნიუსთან" საუბარში განაცხადა, მის შვილს დღეს დასვენების დღე ჰქონდა, უნდა შეხვედროდნენ, 08:00 საათიდან ელოდებიან, თუმცა შეხვედრა ამ დრომდე ვერ ხერხდება.

მისივე განცხადებით, ეუბნებიან, რომ ჯარისკაცი სავარჯიშოდ წაიყვანეს. თუმცა, როგორც ჯარისკაცის დედა აღნიშნავს, ყაზარმული რეჟიმის დროს ჯარისკაცები სავარჯიშოდ არ მიჰყავთ.

ჯარისკაცის დედა ეჭვობს, რომ მისი შვილი შესაძლოა, ნაცემი იყოს. მასაც აქვს ინფორმაცია წუხელ სამხედრო ნაწილში მომხდარ ინციდენტთან დაკავშირებით. მისივე განმარტებით, ფლობს ინფორმაციას, რომ ჯარისკაცები ყაზარმულ რეჟიმზე არიან.

"ინტერპრესნიუსმა" მოახერხა მე-4 ბრიგადის ჯარისკაცებთან გასაუბრება. როგორც ისინი პირად საუბრებში ყვებიან, 42-ე ბატალიონში ჰყავთ მეგობრები და ფლობენ ინფორმაციას, რომ ბატალიონის მთელი ასეული ყაზარმულ რეჟიმზეა. მათივე განმარტებით, ყაზარმულ რეჟიმს საფუძვლად დაედო სამხედრო ნაწილში იარაღის დაკარგვა. თუმცა, ისინი სამხედრო ნაწილში წუხელ ჯარისკაცების ცემის შესახებ ინფორმაციას არ ადასტურებენ.

დღეს დილით "ინტერპრესნიუსს" "ყოფილი პოლიტპატიმრები ადამიანის უფლებებისათვის" ხელმძღვანელმა, ნანა კაკაბაძემ მიაწოდა ინფორმაცია, 42-ე ბატალიონის ალფა ასეულში ჯარისკაცების ცემის ფაქტზე.

როგორც ნანა კაკაბაძემ განაცხადა, აღნიშნული ინფორმაცია მიიღო სამხედრო ნაწილიდან ჯარისკაცების მხრიდან. მას გამოუგზავნეს SMS-ები, სადაც საუბარია, რომ ნაცემია გორელი ჯარისკაცი, კაპრალი ჩოჩელი, რომელიც შვებულებიდან სამხედრო ნაწილში დაბრუნდა და იარაღი დაკარგული დახვდა. ამისთვის მოსთხოვეს პასუხი და სცემეს.
კაკაბაძის ინფორმაციით, სცემეს სერჟანტი, გვარად კიკნაძეც, რომელმაც შეურაცხყოფის გამო ვენები გადაიჭრა. ნაცემია ასევე, გვარად ნადირაძე, სულ 15 ჯარისკაცი.

ნანა კაკაბაძის ინფორმაციით, ჯარისკაცების SMS-ებში, ასევე, აღნიშულია, რომ გუშინ, 19:00-დან 05:00 საათამდე გარეთ ჰყავდათ, სიცივისგან ხელები და ფეხები ეყინებოდათ, მუცელში ფეხებს ურტყამდნენ.

"ინტერპრესნიუსი"