აშშ-ის ხელისუფლების განცხადებით, ამერიკელი სამხედროები ავღანეთს 2014 წლისთვის დატოვებენ. ინფორმაციას ამის შესახებ "The New York Times" ავრცელებს.
გამოცემის თანახმად, ხელისუფლების მიერ შემუშავებული გეგმის საფუძველზე, ძალაუფლება ავღანეთის პროვინციებში 2010-2012 წლებში ეტაპობრივად ადგილობრივ შეიარაღებულ ძალებს გადაეცემა.
ექსპერტების განცხადებით, შემუშავებული გეგმა ერაყიდან ჯარების გამოყვანას ჰგავს. აშშ-მა სამხედროების 2/3 ერაყის ტერიტორიიდან 2010 წლის ზაფხულში გამოიყვანა, პრეზიდენტმა ობამამ კი ერაყული მისიის დასრულებაზე ოფიციალურად განაცხადა.
ამასთან, სააგენტო "ეფეს" ცნობით, დღეს ავღანეთის ტერიტორიაზე ნატო-ს შვიდი ჯარისკაცი დაიღუპა. ხუთი მათგანი თავდასხმას შეეწირა, ორი კი აფეთქების შედეგად დაიღუპა.
სულ 2010 წლის განმავლობაში ავღანეთში კოალიციური ჯარების 640 სამხედრო დაიღუპა.
"ინტერპრესნიუსი"