ჩრდილოატლანტიკური ალიანსი ლისაბონის სამიტისთვის ემზადება. პორტუგალიის დედაქალაქში წევრი ქვეყნების ლიდერები ჩავლენ და ნატოს ახალ სტრატეგიულ კონცეფციას მიიღებენ.
"ნაკლები დრაკონები, მეტი გველები", - ასეთი სათაურით ეკონომისტი აქვეყნებს სტატიას ნატო-ს მომავალ კონცეფციაზე.
გამოცემის ცნობით, დღის წესრიგში რამდენიმე საკითხია - ავღანეთის ხანგრძლივი ომის პერსპექტივები, ირანის ბირთვული ამბიციები, საქართველოსთან ომის გამო გაჩენილი ყინულის შემდეგ, ნატო-ს ორაზროვანი ურთიერთობების გადატვირთვა თავის ძველ მტერთან, რუსეთთან.
როგორც "ეკონომისტი" წერს, ნატო-ს ახალ კონცეფციას, რომელიც ექსპერტთა ჯგუფმა მადლენ ოლბრაიტის ხელმძღვანელობით მოამზადა, უკვე უწოდებენ მგრძნობიარე დოკუმენტს. დოკუმენტში მოცემულია ალიანსის ახალი ხედვა ნატო-ს მთავარი ვალდებულების შესახებ კოლექტიურ უსაფრთხოებაზე. ალიანსს სურს, აჩვენოს მზადყოფნა, რათა დააჩქაროს ბალისტიკური რაკეტებს საწინააღმდეგო ფარის გაშვება. ნატო-ს გენერალური მდივანი რასმუსენი ამბობს, რომ მათ უნდა დაარწმუნონ სკეპტიკოსები, რომ ნატოს შეუძლია მათი დაცვა ახალი საფრთხეებისგან.
"რუსეთს სიყვარულით", - ასეა დასათაურებული სტატის ერთ-ერთი თავი, სადაც რუსეთ-ნატო-ს ურთიერთობები და საქართველოს პერსპექტივაა განხილული.
"მედვედევმა დოვილში შეხვედრის შემდეგ მიიღო მიწვევა ლისაბონში, სადაც დაესწრება ნატო-რუსეთის საბჭოს პირველ სხდომას. საბჭო შეიქმნა საქართველოსთან უთანხმოების შემდეგ. თუ გავითვალისწინებთ, რომ ნატო-სა და რუსეთს აქვს საერთო ინტერესები - მასობრივი განადგურების იარაღის გავრცელების შემცირება, კონფლიქტები, ტერორიზმთან ბრძოლა და ნარკოვაჭრობა, არსებობს იმედი, რომ კონსტრუქციული შეთანხმება მოხდება", - წერს გამოცემა.
გამოცემის ინფორმაციით, ნატო გააგრძელებს ღია კარის პოლიტიკას ახალი წევრებისთვის, უკრაინისა და საქართველოსთვის. მიუხედავად ამისა, საქრთველოს დიდი ხანი დასჭირდება, რომ დააკმაყოფილოს მოთხოვნები, ხოლო უკრაინას ჯერ არც კი აქვს გადაწყვეტილი, უნდა თუ არა ნატო-ში.
"ცივი ომის დასრულებიდან ოცი წლის შემდეგ, ნატო-ს წესები მრავალჯერ დაიწერა. მსოფლიოში ბევრი დრაკონია და კიდევ უფრო მეტი - გველი. ამიტომ ვერ სრულდება ყველა წესი. თუმცა, ნატო-ს სულ უფრო მეტი წვერი ჰყავს, ქვეყნებს სურთ გაწევრიანება და ყველაზე უფრო კრიტიკულად განწყობილებიც კი აღიარებენ ალიანსის საჭიროებას. ჩავარდნების მიუხედავად, ნატო უსაფრთხოების ქვაკუთხედია", - წერს "ეკონომისტი".
"ინტერპრესნიუსი"