ბოლო რამდენიმე თვეა დამკვირვებლები ამჩნევენ, რომ პრეზიდენტმა დიმიტრი მედვედევმა მედიასტრატეგიაში ცვლილებები შეიტანა - მას სურს, რომ თავი დამოუკიდებელ პოლიტიკოსად წარმოაჩინოს და ამის მიღწევას ხალხთან ხშირი ურთიერთობით ცდილობს. პუტინისა და მედვედევის ტანდემმა მედიასივრცის განაწილება გადაწყვიტა, ამიერიდან ისინი ერთმანეთს აღარ ბაძავენ, აღნიშნავს "Независимая газета".
ჯერ კიდევ ცოტა ხნის წინ მედვედევი პრემიერ პუტინის ნაბიჯებს კვალდაკვალ იმეორებდა. აგვისტოს ბოლოს მთავრობის მეთაურმა შორეულ აღმოსავლეთში "Lada Kalina"-ზე გამართულ ავტორბოლაში იასპარეზა, სექტემბრში კი მედვედევმა მოსკოვი-კიევის მიმართულებით რალიში მონაწილეობა მიიღო.
გარდა ამისა, აგვისტოს ბოლოს პუტინმა თევზჭერის განვითარების საკითხზე კამჩატკაზე თათბირი მოაწყო, რამდენიმე კვირის შემდეგ კი მედვედევმა იმავე თემაზე მურმანსკში სხდომა გამართა.
"საკუთარ ინდივიდუალურობას ხაზს ვერ გაუსვამ, თუ პრემიერის მიერ თევზჭერის შესახებ გამართული თათბირიდან ორ კვირაში იმავე თემაზე სხდომას გამართავ. პირიქით, გაჩნდება კითხვა: თუ პრეზიდენტი პრემიერის დუბლირებას აკეთებს, მათ შორის მოვალეობები როგორ გადანაწილდება?" - აცხადებს პოლიტტექნოლოგიების ცენტრის გენერალური დირექტორის მოადგილე ალექსეი მაკარკინი.
კრემლის წარმომადგენელთა თქმით, ტანდემის თითოეული წევრი ახლა საკუთარი იმიჯის შექმნას ცდილობს. მაგალითად, პრეზიდენტი კალიფორნიის გუბერნატორ არნოლდ შვარცენეგერს მასპინძლობს, ამერიკელ ბიზნესმენებთან ერთად სკოლკოვოში სეირნობს, შემდეგ როკ-მუსიკოსებს ხვდება და მოხუცებულთა თავშესაფარს სტუმრობს, პარალელურად კი პოლიტიკურ პრობლემებს ჭრის - მოსკოვის მერის იური ლუჟკოვის თანამდებობიდან გათავისუფლება ამის თვალსაჩინო მაგალითია.
ბოლო დროს პრეზიდენტის საჯარო გამოსვლებში სოციალური მიმართულება იკვეთება. აუდიტორიასთან ის პირადი კონტაქტის დამყარებას ცდილობს, რაც საარჩევნო კამპანიისთვის არის დამახასიათებელი. პუტინი კი ამ დროს ეკონომიკური საკითხების გადაჭრით, სოჭის ოლიმპიადის სამზადისითა და საინვესტიციო ფორუმებში მონაწილეობით არის დაკავებული.
ექსპერტ მაკარკინის აზრით, პუტინს მოსახლეობასთან მჭიდრო ურთიერთობა არ სჭირდება, მას უკვე ხალხთან დაახლოებული პოლიტიკოსის იმიჯი აქვს, ახლა კი მედვედევის ჯერია.
მომზადებულია ng.ru-ს მიხედვით.