გერმანიის კანცლერმა ანგელა მერკელმა ბერლინში ნატო-ს გენერალურ მდივან ანდერს ფოგ რასმუსენთან შეხვედრის დროს განაცხადა, რომ ჩრდილოატლანტიკური ალიანსის რუსეთთან სწრაფი დაახლოების წინააღმდეგია, იტყობინება "Deutschland Funk".
კანცლერმა აღნიშნა, რომ "მხარეებმა ერთმანეთისგან მეტისმეტად ბევრი არ უნდა მოითხოვონ". რუსეთის პრეზიდენტი დიმიტრი მედვედევი 19 ნოემბერს ნატო-ს სამიტში მიიღებს მონაწილეობას, რომელიც ლისაბონში გაიმართება. მერკელის თქმით, ეს უკვე წინ გადადგმული დიდი ნაბიჯია.
თუმცა, როგორც მერკელი აღნიშნავს, დასაწყისისთვის რუსეთმა და ნატო-მ მოსალოდნელ საფრთხეებს ერთობლივი ანალიზი უნდა გაუკეთონ და მხოლოდ ამის შემდეგ იქნება შესაძლებელი იმ სფეროების განსაზღვრა, რომლებშიც რუსეთი და ჩრდილოატლანტიკური ალიანსი ითანამშრომლებენ.
შეგახსენებთ, რომ ადრე ნატო-ს გენერალურმა მდივანმა ანდერს ფოგ რასმუსენმა რუსეთს ევროპის რაკეტსაწინააღმდეგო თავდაცვის ერთიან სისტემაში ჩართვა შესთავაზა. დიმიტრი მედვედევმა რუსეთ-ნატო-ს თანამშრომლობის გაფართოვებისთვის მზადყოფნა გამოთქვა და 19 ოქტომბერს განაცხადა, რომ ლისაბონში ალიანსის სამიტზე წავიდოდა.
გავრცელებული ინფორმაციით, ამგვარი ნაბიჯის აუცილებლობაში მედვედევი ნიკოლა სარკოზიმ და ანგელა მერკელმა დაარწმუნეს, რომლებიც მას, სამმხრივი მოლაპარაკების ფარგლებში, საფრანგეთის ქალაქ დოვილში შეხვდნენ. "მოხარული ვარ, რომ რუსეთი ნატო-ს სამიტში მიიღებს მონაწილეობას", - განაცხადა მაშინ მერკელმა.
მომზადებულია Deutschland Funk-ის მიხედვით.