საგარეო საქმეთა მინისტრის მოადგილე ნინო კალანდაძე გამოეხმაურა ცხინვალის რეჟიმის ბრალდებას, რომლის მიხედვითაც, ქართული მხარე ისრაელისაგან ცხინვალზე თავდასხმისათვის "მერკავა-4"-ის ტიპის ტანკებს ყიდულობს.
როგორც ნინო კალანდაძემ განაცხადა, საქართველო არასოდეს ემზადებოდა ვინმეზე თავდასხმისთვის, თუმცა საიდუმლო არ არის, რომ ქვეყანა თავდაცვას აძლიერებს.
"ჩვენ, ჩვენი შესაძლებლობების ფარგლებში ვცდილობთ გავაძლიეროთ ჩვენი თავდაცვა, თუმცა, რა იარაღია შეძენილი, ამის შესახებ ინფორმაციას არ ვფლობთ და ინფორმაციას შესაბამისი უწყებები მოგაწვდიან. ჩვენ ყველა შესაძლო გზას მივმართავთ ჩვენი უსაფრთხოების უზრუნველსაყოფად და ამაში ჩვენი მოკავშირეებიც გვეხმარებიან", - განაცხადა ნინო კალანდაძემ.
კალანდაძე გამოეხმაურა ასევე ცხინვალის ბრალდებას, იმასთან დაკავშირებით, თითქოს ქართული უპილოტო თვითმფრინავები ცხინვალის თავზე დაფრინავენ. როგორც კალანდაძემ განაცხადა, მას ამის შესახებ ინფორმაცია არ აქვს, თუმცა "ეს არის საქართველოს ტერიტორია და თუკი ასეთი რამ ხდება, საქართველოს ამის სუვერენული უფლება აქვს".
"ინტერპრესნიუსი"