ლატვიამ რუსული ბომბდამშენების მიერ ქვეყნის საჰაერო სივრცის გადაკვეთა "არამეგობრულ" ჟესტად შეაფასა. რუსეთის თავდაცვის სამინისტრო ლატვიის ბრალდებას უსაფუძვლოს უწოდებს. "რუსეთის თვითმფრინავებს ლატვიის საჰაერო სივრცე არ დაურღვევიათ. ფრენა დაგეგმილი საბრძოლო მომზადების ფარგლებში ხორციელდებოდა", - განაცხადა რუსეთის თავდაცვის სამინისტროს წარმომადგენელმა.
ლატვიის თავდაცვის მინისტრმა იმანტ ლიეგისმა განაცხადა, რომ 18 ოქტომბერს დღის მეორე ნახევარში ბალტიის ზღვის თავზე ლიეპაიასა და ვენტსპილსს შორის ორმა რუსულმა ბომბდამშენმა გადაიფრინა.
"ინციდენტი ადგილობრივი დროით 17:00 საათზე მოხდა, როდესაც ნატო-ს მიერ კონტროლირებადი საჰაერო სივრცის საზღვრებთან ორი თვითმფრინავი გამოჩნდა, რის შემდეგაც ლიტვის ზოკნაიას ავიაბაზიდან ჰაერში ნატო-ს სამხედრო საჰაერო ძალების ორი ამერიკული გამანადგურებელი აფრინდა", - განაცხადა ლიეგისმა.
როგორც ლატვიის თავდაცვის სამინისტროს წარმომადგენელმა აირის რიკვეილისმა აღნიშნა, "სუ-24 ტიპის ბომბდამშენებმა ბალტიის ზღვის ნეიტრალური წყლების თავზე გადაიფრინეს და იდენტიფიკაციის შესახებ მოთხოვნას არ უპასუხეს. "ეს არამეგობრული ჟესტია".
რუსეთის თავდაცვის მინისტრმა აღნიშნა, რომ ამ საკითხს ლატვიის საგარეო საქმეთა სამინისტროს შეუთანხმებენ.
მომზადებულია interfax.ru-ს მიხედვით.