აშშ და პაკისტანი გასული საუკუნის 80-იან წლებში ავღანეთში საბჭოთა კავშირის ჯარების წინააღმდეგ წარმოებულ ჯიჰადში მონაწილეობდნენ.
სააგენტო "იტარ-ტასის" ცნობით, ასეთი აღიარებით პაკისტანის ყოფილი პრეზიდენტი ფერვეზ მუშარაფი ატლანტიკურ საბჭოში გამოვიდა.
"1979-დან 1989 წლამდე ჩვენ ვაწარმოებდით ჯიჰადს საბჭოთა კავშირის ჯარის წინააღმდეგ. როცა ვამბობ ჩვენ, ვგულისხმობ პაკისტანსა და აშშ-ს. ჩვენ ამას ჯიჰადს ვუწოდებთ, რადგან გვსურდა საბჭოთა კავშირის წინააღმდეგ ბრძოლაში მთელი მსოფლიოს მოჯაჰედები მოგვეზიდა. ჩვენ ასევე ვამზადებდით და ვაიარაღებდით "თალიბებს", შემდეგ კი მათ ავღანეთში ვგზავნიდით", - განაცხადა მუშარაფმა.
მისივე თქმით, ამერიკა ავღანეთსა და პაკისტანში დღეს საკუთარი პოლიტიკის შედეგს იმკის, რომელიც "ცივი ომის" პერიოდში მოჯაჰედების მხარდასაჭერად იყო მიმართული.
"სხვათა შორის, ამას ამერიკელი ოფიციალური პირებიც აღიარებენ, სახელმწიფო მდივან ჰილარი კლინტონის ჩათვლით", - აღნიშნა მუშარაფიმ.
ეს მისი პირველი გამოჩენა იყო აშშ-ის ფართო აუდიტორიის წინაშე თანამდებობიდან გადადგომის შემდეგ.
მუშარაფი დიდ პოლიტიკაში დაბრუნების სურვილს დღემდე არ მალავს. მისი თქმით, ქვეყანაში სოციალურ-ეკონომიკური მდგომარეობა უარესდება, რაც მოსახლეობის უკმაყოფილებას იწვევს. ექსპრეზიდენტი მიიჩნევს, რომ მოქმედ მთავრობას პრობლემების გადაწყვეტა არ შეუძლია.
"ინტერპრესნიუსი"