ჩეჩენ დეპუტატებზე თავდამსხმელი ყველა შეიარაღებული პირი ლიკვიდირებულია, - ამის შესახებ სამართალდამცავი ორგანოების წყაროზე დაყრდნობით სააგენტო "ინტერფაქსი" იუწყება. წყაროს ცნობით, შეიარაღებული პირების ნეიტრალიზების სპეცოპერაცია დასრულებულია. რუსული სააგენტოების ცნობით, დაღუპულია სულ მცირე ექვსი ადამიანი, 13 კი, ჰოსპიტალიზირებულია. რამდენიმე რუსული სააგენტო 10 დაღუპულის შესახებ იუწყება. ამასთან, ჯერ უცნობია, დაღუპულებს შორის არიან თუ არა სამოქალაქო პირები.
სააგენტო "რია ნოვოსტის" ცნობით, ჩეჩნეთის პრეზიდენტ რამზან კადიროვსა და ვლადიმერ პუტინს შორის სატელეფონო საუბარი შედგა. მათ გროზნოში სპეცოპერაციის დეტალები განიხილეს. ასევე, ისაუბრეს დაშავებულთა და დაღუპულთა ოჯახებისათვის დახმარების აღმოჩენაზე.
არსებული ინფორმაციით, დღეს დილით პარლამენტში მისულ დეპუტატებს თან მიჰყვა მსუბუქი ავტომანქანა, რომელშიც შეიარაღებული დაჯგუფის წევრები ისხდნენ. მათგან ერთ-ერთმა ასაფეთქებელი მოწყობილობა აამოქმედა, დანარჩენები პარლამენტის შენობასთან მიიჭრნენ და სროლა დაიწყეს.
შეიარაღებული დაჯგუფების გასანადგურებლად სპეცოპერაცია ჩატარდა.
დღეს დილით შეიარაღებული დაჯგუფების ერთ-ერთმა წევრმა პარლამენტის შენობასთან თავი აიფეთქა.
"დილით, პარლამენტში მისულ დეპუტატებს თან მიჰყვა მსუბუქი ავტომანქანა, რომელშიც ტერორისტები ისხდნენ. მათგან ერთ-ერთმა ასაფეთქებელი მოწყობილობა აამოქმედა, დანარჩენი ორი კი პარლამენტის შენობასთან მიიჭრა და სროლა დაიწყო", - განაცხადა წყარომ.
მისივე თქმით, მთელი სამოქალაქო პერსონალი ევაკუირებულია, ტერიტორია ბლოკირებულია, შეიარაღებული დაჯგუფების გასანადგურებლად სპეცოპერაცია ჩატარდა.
შემთხვევის ადგილზე იმყოფება ჩეჩნეთის პრეზიდენტი რამზან კადიროვიც. ჩეჩნეთშია ჩასული რუსეთის შინაგან საქმეთა მინისტრი რაშიდ ნურგალიევიც.
ამასთან, ამ წუთებში გავრცელდა ინფორმაცია, რომ ტერაქტის მცდელობა განხორციელდა არა პარლამენტის, არამედ სოფლის მეურნეობის სამინისტროს შენობაში.