ჩეჩნეთის შინაგან საქმეთა სამინისტრომ პარლამენტზე გუშინ მომხდარი თავდასხმის ორგანიზატორი დაასახელა.
სამინისტროს ცნობით, "ჩეჩნეთის პარლამენტზე თავდასხმა ახალმა ბანდფორმირებამ განახორციელა, რომელსაც ჰუსეინ გაკაევი ხელმძღვანელობს".
"გაკაევი ცოტა ხნის წინ დოკუ უმაროვის დაქვემდებარებიდან გამოვიდა და ექსტრემისტთა უმრავლესობა გადაიბირა. გაკაევმა თავდასხმა სახელის მოხვეჭის გამო განახორციელა", - აცხადებენ ჩეჩნეთის შინაგან საქმეთა სამინისტროში.
ამასთან, ჩეჩნეთის პრეზიდენტმა, რამზან კადიროვმა პარლამენტზე თავდასხმაში გუშინ ახმედ ზაკაევი დაადანაშაულა.
"ლოთი და ალკოჰოლიკი ზაკაევი, ასევე, მისი მფარველები ლონდონსა და სხვა დასავლურ ქალაქებში, ვერაფერს შეძლებენ. ჩეჩნეთის რესპუბლიკა შედგა და პარლამენტი მშვიდობიანი და სტაბილური რეგიონია", - განაცხადა კადიროვმა. კადიროვის ბრალდება ახმედ ზაკაევმა გუშინვე უარყო.
ჩეჩნეთის პარლამენტზე შეიარაღებული დაჯგუფების წევრებმა თავდასხმა 19 ოქტომბერს განახორციელეს. არსებული ინფორმაციით, დაიღუპა 11 ადამიანი - დაჯგუფების 6 წევრი და პარლამენტის დაცვის 5 თანამშრომელი; დაიჭრა - 18.
"ინტერპრესნიუსი"