ჩეჩენი სეპარატისტების ლიდერი დოკუ უმაროვი აცხადებს, რომ ახმედ ზაკაევის საქმიანობას ჯორჯ სოროსი აფინანსებს. როგორც "Росбалт"-ი იტყობინება, უმაროვის განცხადებას შეიარაღებული მებრძოლების ერთ-ერთი საიტი ავრცელებს.

უმაროვის თქმით, სოროსმა ზაკაევს პოლონეთში ჩეჩნების მსოფლიო კონგრესის ჩასატარებლად 10 მლნ დოლარი მისცა. უმაროვს მიაჩნია, რომ "ეს ფული ჯიჰადსა და მუსლიმანებს ვერც ახლა და ვერც მომავალში სარგებელს ვერ მოუტანს, რადგან კონგრესი მიზნად მშვიდობის მიღწევას დიპლომატიური გზით ისახავდა. უმაროვი დარწმუნებულია, რომ კონგრესის მიზანი შეიარაღებულ მებრძოლებში განხეთქილების შეტანა იყო.

2010 წლის სექტემბერში პოლონეთში, ჩეჩნების კონგრესის მიმდინარეობის დროს, ზაკაევი, რომლის გადაცემასაც რუსეთი ითხოვს, პოლონეთის პოლიციამ დააკავა, თუმცა მოგვიანებით ის გაათავისუფლეს, რის შემდეგაც დიდ ბრიტანეთში დაბრუნდა.

2010 წლის ოქტომბერში ზაკაევმა იჩქერიის თვითაღიარებული რესპუბლიკის მთავრობა, რომელსაც თავად მეთაურობდა, დაითხოვა და თავად ხუსეინ გაკაევს დაექვემდებარა, რომელიც თავდაცვის სახელმწიფო კომიტეტს ხელმძღვანელობდა.

მომზადებულია Росбалт-ის მიხედვით.