ისრაელში ქვეყნის სამხედრო-საჰაერო ძალების კუთვნილი ამერიკული წარმოების F-16I ტიპის გამანადგურებელი ჩამოვარდა, იტყობინება სააგენტო "ფრანს-პრესი".
გამანადგურებელი, რომლის ეკიპაჟიც 2 კაცისგან შედგებოდა 10 ნომებრის საღამოს ნეგევის უდაბნოში კრატერ რამონის რაიონში დაგეგმილი სასწავლო წვრთნების დროს ჩამოვარდა.
გამანადგურებლის ბორტზე მყოფი პილოტისა და შტურმანის ბედი ჯერჯერობით გაურკვეველია. თვითმფრინავის ჩამოვარდნის რაიონში სამძებრო-სამაშველო ოპერაცია ხორციელდება, აცხადებს ისრაელის სამხედრო-საჰაერო ძალების წარმომადგენელი.
F-16I კომპანია Lockheed Martin-ის წარმოების F-16-ის მოდიფიკაციაა. ნეგევის უდაბნოში F-16I-ის ჩამოვარდნა ამ მოდიფიკაციის თვითმფრინავისთვის პირველი კატასტროფაა. ოფიციალური მონაცემებით 2009 წელს ისრაელის სამხედრო-საჰაერო ძალები F-16 ტიპის 345 გამანადგურებელს ფლობდა, მათ შორის 101 F-16I გამანადგურებელი იყო.
მომზადებულია afp.com-ის მიხედვით.