ლისაბონში დღეს ნატო-ს სამიტი იხსნება, რომელსაც ალიანსის გენერალურმა მდივანმა, ანდრეს ფოგ რასმუსენმა ნატო-ს ისტორიაში ყველაზე მნიშვნელოვანი უწოდა.

სამიტის მთავარი საკითხი, 2014 წლამდე ავღანეთში ნატო-ს ოპერაციის დასრულების გეგმები იქნება. ნატო-ს წევრი ქვეყნები შეეცდებიან, ალიანსის მომავალი განვითარების ახალი სტრატეგიული კონცეფცია შეიმუშავონ. ისინი იმსეჯელებენ უახლოესი ათწლეულის საფრთხეების შესაბამის თავდაცვით საშუალებებზეც.

სამიტის მუშაობაში მონაწილეობას მიიღებს რუსეთის პრეზიდენტი, დიმიტრი მედვედევი. იგი ალიანსის წევრი ქვეყნების ლიდერებს შეხვდება. რუსეთის პრეზიდენტი რუსეთ-საქართველოს 2008 წლის ომის შემდეგ პირველად მიიღებს ნატო-ს სამიტში მონაწილეობას. მასთან მუშაობის ერთ-ერთი მთავარი თემა რაკეტსაწინააღმდეგო თავდაცვის ერთობლივი სისტემების შექმნის საკითხი იქნება.

ლისაბონის სამიტზე, 20 ნოემბერს იგეგმება ავღანეთის პრეზიდენტის, ჰამიდ კარზაის გამოსვლა. მას სურს, რომ ნატო-მ ავღანეთზე კონტროლი ქვეყნის ხელისუფლებას 2014 წლის ბოლოსთვის გადასცეს.
ლისაბონის სამიტი ორდღიანია და მუშაობას ხვალ დაასრულებს.

"ინტერპრესნიუსი"