ყირგიზეთში "მანასის" ამერიკულ ავიაბაზაზე საწვავის მიწოდებასთან დაკავშირებით აშშ-ში სკანდალი აგორდა. აშშ-ის კონგრესმა პენტაგონი დაუდევრობის გამო გააკრიტიკა, რომლის შედეგადაც ავღანეთის ომში მონაწილე თვითმფრინავები რუსეთის საავიაციო საწავავით მარაგდებოდა.
სკანდალის საფუძველი ეროვნული უშიშროებისა და საგარეო საკითხების ქვეკომიტეტის მოხსენება გახდა. კონგრესმენების მონაცემებით, პენტაგონის კონტრაქტორები საწვავს "გაზპრომის" განყოფილებისგან ყიდულობდნენ, ხოლო რუსეთის ხელისუფლებას გაყალბებულ საბუთებს აწვდიდნენ, სადაც აღნიშნული იყო, რომ საწვავი მხოლოდ სამოქალაქო ავიაციისთვის გამოიყენებოდა.
სინამდვილეში კი ამ საწვავით "მანასის" ბაზა მარაგდებოდა. საწვავის მიწოდებით გიბრალტარში დარეგისტრირებული ორი კომპანია Red Star-ი და Mina Corporation-ი იყო დაკავებული, რომლებსაც ყოფილი ამერიკელი სამხედროები მართავენ.
გაყალბება, სავარაუდოდ, იმისთვის დასჭირდათ, რომ ამერიკელებს საწვავის შემოტანისას რუსეთის საექსპორტო შეზღუდვებისთვის გვერდი აევლოთ.
Red Star-ისა და Mina Corporation-ის წარმომადგენელმა ჩარლზ სკვაიესმა განაცხადა, რომ "რუსეთის ხელისუფლება დოკუმენტებთან დაკავშირებით საქმის კურსში იყო, თუმცა დუმდა, რადგან "გაზპრომი" გაყიდვებიდან მოგებას ნახულობდა".
მომზადებულია nytimes.com-ის მიხედვით.