ნატო-ს გენერალური მდივანი ანდრეს ფორგ რასმუსენი რუსეთს მოუწოდებს, რაკეტსაწინააღმდეგი თავდაცვის სფეროში ნატო-სთან ითანამშრომლოს . ამის შესახებ გენერალური მდივანი "The New York Times"-ში წერს.
რასმუსენის განცხადებით, რაკეტსაწინააღმდეგო თავდაცვის სისტემას, სამხედროსთან ერთად, პოლიტიკური სარგებლის მოტანაც შეუძლია.
"ეს იქნება სამოკავშირეო სოლიდარობის მკაფიო დემონსტრირება და საერთო საფრთხის წინაშე ტვირთის განაწილება, რაც რუსეთთან თანამშრომლობის შესაძლებლობებს იძლევა. ნატო-რუსეთის თანამშრომლობა რაკეტსაწინააღმდეგო თავდაცვის სფეროში იქნება საბოლოო და მტკიცე განაცხადი, რომ უსაფრთხოების ერთიან ევროატლანტიკურ ჭერქვეშ თანამშრომლობის ჭეშმარიტად ახალი ეპოქა იწყება", - აცხადებს რასმუსენი.
გენერალურ მდივანს მიაჩნია, რომ რაკეტსაწინააღმდეგო თავდაცის სისტემამ უნდა დაიცვას მოსახლეობა და ტერიტორია იმ საფრთხისგან, რომელსაც სარაკეტო შეიარაღების გავრცელება წარმოადგენს.
"ნატო-ს შეუძლია ამის გაკეთება, თანაც ხელმისაწვდომ ფასად. ლისაბონის სამიტი არის შანსი ნატო-სთვის, მიიღოს გადაწყვეტილება ჩვენი მოსახლეობისა და ტერიტორიის დაცვის შესაძლებლობების გაფართოებაზე და, იმავდროულად, ეს არის მოწოდება რუსეთისადმი, ითანამშრომლოს ჩვენთან და ისარგებლოს ამ უპირატესობებით", - წერს გენერალური მდივანი.
"ინტერპრესნიუსი"