რუსეთმა ცხინვალთან ახლოს "სმერჩის" ტიპის რეაქტიული ზალპური ცეცხლის დანადგარები განათავსა. ამის შესახებ რუსული მედია სამხრეთის ფედერალური ოლქის ძალოვანი სტრუქტურების ინფორმაციაზე დაყრდნობით იუწყება.
"საქართველოს მხრიდან შესაძლო აგრესიის აღსაკვეთად სამხრეთ ოსეთის დედაქალაქთან ახლოს განთავსებულია გვარდიის რეაქტიული არტილერიის ცალკეული დივიზიონი, რომელიც აღჭურვილია "სმერჩის" ტიპის სისტემებით", - განაცხადეს სამხრეთის ფედერალური ოლქის ძალოვან სტრუქტურებში.
აქვე აღნიშნეს, რომ დივიზიონი სრულ საბრძოლო მზაყოფნაშია, დივიზიონის პირადი შემადგენლობა კი კონტრაქტით დაქირავებული სამხედროებით არის დაკომპლექტებული, რომლებსაც აღნიშნული საარტილერიო კომპლექსის გამოყენების გამოცდილება აქვთ.
"სმერჩის" ტიპის რაკეტების მოქმედების მინიმალური მანძილი 20, მაქსიმალური კი 70 კილომეტრია. ერთი გასროლით 70 ჰექტარი ფართობის განადგურებაა შესაძლებელი, სროლისთვის მომზადებას კი სულ რამდენიმე წუთი სჭირდება.
ამასთან, საქართველოს საგარეო საქმეთა სამინისტრო ე.წ. სამხრეთ ოსეთში რუსეთის მიერ შეიარაღების გაზრდის თაობაზე ინფორმაციას არ ფლობს.
"ინტერპრესნიუსი"