სომალელმა მეკობრეებმა მძევალი მოკლეს. მეკობრეები ამტკიცებენ, რომ მძევლად ბრიტანელები აიყვანეს, თუმცა მათ მიერ მოკლული მამაკაცი წარმოშობით სამხრეთ აფრიკელია.
ტურისტული ხომალდის მგზავრი, რომელიც სომალელმა მეკობრეებმა 1 ნოემბერს კენიის პორტ ბარავეს მახლობლად შეიპყრეს, სიცოცხლეს იმის გამო გამოასალმეს, რომ ხმელეთზე გადასვლის ბრძანებას არ დაემორჩილა, - იუწყება ”რია ნოვოსტი”.
ინციდენტის დროს გემბანზე მამაკაცის გარდა ქალები და ბავშვები იმყოფებოდნენ, რომლებიც მეკობრეებმა ნაპირზე გადმოსვეს და გაურკვეველი მიმართულებით წაიყვანეს, ხომალდი კი ნაპირის მახლობლად მიატოვეს.
ფაქტზე ამ დრომდე კომენტარი არც ბრიტანეთისა და არც სამხრეთ აფრიკის ხელისუფლებას არ გაუკეთებია.
ბოლო ხანებში სომალელმა მეკობრეებმა მეზობელი კენიის ტერიტორიაზე თავდასხმები გაახშირეს.
შეგახსენებთ, რომ 25 ოქტომბერს მეკობრეებმა გერმანული ხომალდი Beluga Fortune გაათავისუფლეს, 23 ოქტომბერს ისინი კენიის სანაპიროსთან თავს სინგაპურის დროშის ქვეშ მცურავ York-ს დაესხნენ, რომლის ბორტზეც 17 მეზღვაური იმყოფებოდა, შემდეგი თევზმჭერი Golden Wave-ი იყო.
ამჟამად სომალელი მეკობრეების ტყვეობაში სულ 25 ხომალდი და 400-მდე მეზღვაურია.
სომალის ხელისუფლება მეკობრეებთან ბრძოლას ვერ ახერხებს, რადგან მან როგორც ერთიანმა სახელმწიფომ არსებობა ჯერ კიდევ 1991 წელს შეწყვიტა.
მომზადებულია topnews.ru-ს მიხედვით.