აშშ-დან დაბრუნების შემდეგ ისრაელის პრემიერ-მინისტრმა ბინიამინ ნეთანიაჰუმ ვიზიტის შედეგების განსახილველად "ვიწრო" კაბინეტის საგანგებო სხდომა გამართა. ვაშინგტონი იუდეისა და სამარიას დასახლებების მშენებლობაზე განმეორებით 90-დღიანი მორატორიუმის გამოცხადებას მოითხოვს.

როგორც ებრაული საინფორმაციო საშუალებები იტყობინებიან, ჯერ კიდევ ოთხი კვირის წინ ისრაელის მთვარობის მეთუარმა პირობა დადო, რომ იუდეისა და სამარიას დასახლებების მშენებლობა გაგრძელდებოდა. მაშინ მან აღნიშნა, რომ ახალი მორატორიუმი მხოლოდ ერთ შემთხვევაშია შესაძლებელი: თუ პალესტინელები ისრაელს ებრაულ სახელმწიფოდ აღიარებენ. თუმცა ვაშინგტონი "მშენებლობის გაყინვის" წინადადებით გამოდის.

იუდეასა და სამარიაში დასახლებების მშენებლობაზე უარის თქმის სანაცვლოდ, ვაშინგტონი იერუსალიმს "სამხედრო დახმარების პაკეტს" სთავაზობს, რომელიც F-35 ტიპის 20 გამანადგურებელის გადაცემას ითვალისწინებს. როგორც ებრაული მედია აცხადებს, თეთრი სახლის ამ წინადადებას კონგრესმაც უნდა დაუჭიროს მხარი. "სამხედრო დახმარების პაკეტის" ღირებულება 3 მლრდ დოლარს შეადგენს.

გარდა ამისა, აშშ ისრაელს გაეროს ყველა ანტიებრაულ რეზოლუციაზე ვეტოს დადებას პირდება. აშშ-ის სახელმწიფო დეპარტამენტი არაბულ ქვეყნებზე ზეწოლის გაძლიერებასაც აპირებს, რათა მათ ისრაელის თავდაცვის უფლება აღიარონ.

მომზადებულია newsru.co.il-ის მიხედვით.