რუსეთის ფედერაციის პრეზიდენტის დიმიტრი მედვედევის შეფასებით, რუსულმა არმიამ დაამტკიცა, რომ ქვეყნის ინტერესებისა და მოქალაქეების დაცვა შეუძლია. ამ მოსაზრების დადასტურებად მედვედევმა სამი რუსული ფედერალური არხისთვის მიცემულ დღევანდელ ინტერვიუში რუსეთ-საქართველოს ომი დაასახელა.
"რუსეთის არმიამ აჩვენა, რა შეუძლია, მათ შორის - ჩვენი მოქალაქეების ინტერესების დაცვა, კერძოდ - სამხრეთ ოსეთში", - აღნიშნა მედვედევმა.
რუსეთის პრეზიდენტმა დღეს რუსული არმიის სამი პრობლემაც დაასახელა - მოძველებული სამხედრო ტექნიკა, არასაკმარისი ხელფასი და ცუდი ორგანიზება.
მისივე თქმით, 2009 წელს ყველა აუცილებელი გადაწყვეტილება იქნა მიღებული და ზოგი მათგანი მტკივნეულიც იყო.
მედვედევის განცხადებით, ამჟამად უკვე ყველა ქვედანაყოფი და შენაერთი მუდმივ მზადყოფნაშია, მომდევნო 10 წლის განმავლობაში კი, იგეგმება არმიის სრული გადაიარაღება. პრეზიდენტის თქმით, 2012 წლისთვის რუსი სამხედროების ხელფასები დასავლური არმიების ანაზღაურებას გაუტოლდება.

"InterPressNews"