"აქ არის 4000 გმირის სახელი. აქ არის ბევრი ცარიელი ადგილი და ვისურვებდი, რომ აქ გვარები არ დაემატოს, მაგრამ თუ გვინდა, რომ არსებობდეს საქართველო, ყველანი უნდა ვიყოთ მზად, ჩავიცვათ ეს ფორმა; უნდა ვიყოთ მზად, გადამწყვეტ მომენტში ავიღოთ ხელში იარაღი და ყველანი უნდა ვიყოთ მზად, დავეცეთ ჩვენს მიწაზე და ჩვენი სახელები დაეწეროს მონუმენტის ცარიელ ადგილებზე," განაცხადა მიხეილ სააკაშვილმა. საქართველოს პრეზიდენტმა სპეციალური კაფსულა გმირების სახელების აღმნიშვნელი წარწერებით, მონუმენტთან პირადად მოათავსა.

მონუმენტის გახსნის ცერემონიაზე მისულმა თავდაცვის მინისტრმა განაცხადა, რომ სწორედ ამ გმირების დამსახურებაა საქართველო დღეს დამოუკიდებლობის დღეს რომ აღნიშნავს, – „ჩვენ ყველანი ვალდებული ვართ დღენიადაგ გვახსოვდეს ეს ბიჭები. მე მინდა ვთქვა, რომ აქ არიან როგორც 2008 წლის აგვისტოში დაღუპული გმირები, ისე 90-იან წლებსა და უფრო ადრინდელ დროს დაღუპული ჩვენი მეომრები. სწორედ ამ ბიჭების დამსახურებაა, რომ საქართველო დღეს დამოუკიდებელია და ადგას განვითარების გზას,“ განუცხადა ჟურნალისტებს ბაჩო ახალაიამ.

„გმირთა მონუმენტი“ ესპანელმა დიზაინერმა ალბერტო დომინგო კაბომ დააპროექტა. მისი შექმნის იდეა კი საქართველოს პრეზიდენტს ეკუთვნის.