როგორც "ინტერპრესნიუსს" განსასჯელების ადვოკატმა, ნათია კორკოტაძემ განუცხადა, 30-წლიანი სასჯელი ბრალდებამ შალვა გოგიაშვილისა და კობა ოთანაძის მიმართ მოითხოვა, რომლებსაც ბრალი ედებათ დაუმორჩილებლობასა და ამბოხებაში.

ბრალდების მხარემ 29-წლიანი პატიმრობა მოითხოვა ამავე დანაშაულისთვის განსასჯელ ლევან ამირიძის მიმართ.
ნათია კორკოტაძის ინფორმაციით, პროკურატურამ სამოქალაქო პირების მიმართ, რომლებსაც ბრალი ედებათ ამბოხებასა და იარაღის უკანონოდ შეძენა-შენახვის მცდელობაში 14-წლიანი, კობა კობალაძის მიმართ კი, 13-წლიანი პატიმრობა მოითხოვა.

"შესაძლოა, მოსამართლემ პროუკურატურის მოთხოვნას 2-3 წელი დააკლოს. პროკურატურის ასეთი მოთხოვნა დაუსაბუთებელი და საფუძველს მოკლებულია. მათ საბრალდებო დასკვნა გადმოიტანეს, სასჯელის ზომის გარდა არაფერი დაუმატებიათ, რაც ნიშნავს, რომ რამდენიმეთვიანმა სასამართლო გამოძიებამ ფუჭად ჩაიარა და ტყუილად გვატარეს პროცესებზე", - განაცხადა კორკოტაძემ.

მისივე განმარტებით, სასამართლო პროცესი ხვალ ადვოკატების დაცვითი სიტყვით განახლდება.
საქმეში, რომელსაც მოსამართლე ჯემალ კოპალიანი იხილავს, სულ 28 განსასჯელია. მუხროვანის სამხედრო ბაზაზე ამბოხება 2009 წლის 5 მაისს მოხდა.

"ინტერპრესნიუსი"
მე რომ მკითხოთ ესენი უდანაშაულოები არიან!