გამოცემის მონაცემებით, მოლაპარაკებათა პირველი რაუნდი ქაბულშიც და მის საზღვებს გარეთაც გაიმართა. მოლაპარაკებებში "ავღანეთის პრეზიდენტის ჰამიდ ყარზაის უახლოესი გარემოცვის წარმომადგენლები და პაკისტანის ქალაქ კვეტის თალიბთა საბჭოს წევრები მონაწილეობდნენ. ამ საბჭოს წევრები "ავღანეთში თალიბთა ბრძოლას კურირებენ", - წერს გაზეთი.

გარდა ამისა, ავღანეთის ხელისუფლების წარმომადგენლები ე.წ. "ხაგანთა ქსელის" ლიდერებსაც შეხვდნენ, რომელსაც ქვეყნის ყველაზე ძლიერ პარტიზანულ ფორმირებად მიიჩნევენ. შეხვედრები გაიმართა ასევე პეშავარის საბჭოს წევრებთან, რომელთა მებრძოლებიც ავღანეთის აღმოსავლეთ ნაწილში არიან განლაგებულნი.

გამოცემის ინფორმაციით, "თალიბანის" ლიდერები მოლაპარაკებებზე იმ გარანტიით წავიდნენ, რომ მათ ნატო-ს შეიარაღებული ძალები არც თავს დაესხმოდნენ და არც დააპატიმრებდნენ. თალიბები ჩრდილოატლანტიკური ალიანსის მიერ გამოყოფილი თვითმფრინავით გადაადგილდებოდნენ და ალიანსის შეიარაღებული ძალების მიერ კონტროლირებად რაიონებში ასევე ნატო-ს სამხედრო მოსამსახურეების დაცვის თანხლებით შედიოდნენ.

როგორც გამოცემა წერს, "ვიდრე ამბოხებულები თავს გამარჯვებულად მიიჩნევენ, მოლაპარაკებებზე უარს აცხადებენ". სტატიაში ასევე მოყვანილია ცენტრალური სადაზვერვო სამმართველოს ხელმძღვანელის ლეონ პანეტას სიტყვები, რომელიც აცხადებს, რომ დღეისთვის "თალიბების მხრიდან შერიგების სურვილი ჯერჯერობით არ ჩანს”.

მომზადებულია The New York Times-ის მიხედვით.