31-ე ბატალიონის მესამე ბრიგადის გაძლიერებული ასეული 185 კაცის შემადგენლობით გერმანიაში საქართველოს თავდაცვის მინისტრმა ბაჩო ახალაიამ გააცილა.
სამინისტროს ინფორმაციით, ასეული იმ ბატალიონის შემადგენლობაში შედის, რომელიც ავღანეთში სამშვიდობო მისიის შესასრულებლად მიემგზავრება.
“ჩვენი ბიჭები კარგად არიან მომზადებული. ეს მაძლევს იმის იმედს, რომ მათზე დაკისრებულ ვალდებულებას წარმატებით გაართმევენ თავს”, განაცხადა თავდაცვის მინისტრმა.

31-ე ბატალიონის სამხედრო მოსამსახურეები ISAF-ის (საერთაშორისო უსაფრთხოების უზრუნველყოფის ძალები) სამშვიდობო მისიაში მონაწილეობის მიღების მიზნით სპეციალურ ინტენსიურ წვრთნებს 2009 წლის პირველი სექტემბრიდან გადიან. აშშ-ის გაერთიანებული მრავალეროვანი მზადყოფნის ცენტრში (JMRC) ჯარისკაცების წვრთნასა და მომზადების დონის შეფასებას, როგორც ცენტრის ექსპერტები, ისე ამერიკელი საზღვაო ქვეითების ტრენერთა და მრჩეველთა ჯგუფი ახორციელებენ.

ჰოჰენფელსში ამერიკულ სამხედრო ბაზაზე წვრთნებში 750 ქართველი სამხედრო მონაწილეობს. მათი წვრთნა გერმანიაში ეტაპობრივად მიმდინარეობს. წვრთნების წარმატებით გავლის შემდეგ ქართველი სამხედროები ავღანეთში სამშვიდობო მისიის შესასრულებლად სრულ მზადყოფნაში იქნებიან.

"ინტერპრესნიუსი"