WEB-ARMY.TK - The Best Army's Web

დღეს სამშვიდობო მისიებისთვის ქართველი სამხედროების მომზადების ISAF-ის (საერთაშორისო უსაფრთხოების უზრუნველყოფის ძალები) ფარგლებში სამხედრო წვრთნების ახალი ეტაპი დაიწყო. მისიისთვის მზადებას ამერიკის შეერთებული შტატები და საქართველო იწყებენ ორკვირიანი სამხედრო წვრთნით, პირობითი სახელწოდებით - “დაუყოვნებელი პასუხი”. აღნიშნული წვრთნა იმ პროგრამის ნაწილია, რომელიც მიზნად ისახავს ავღანეთში, საერთაშორისო უსაფრთხოების მხარდაჭერის ოპერაციისათვის ქართველი ჯარისკაცების მომზადებას. წვრთნის ამ ეტაპზე საქართველოს შეიარაღებული ძალები კონტრ-ტერორისტული ოპერაციებისათვის საგანგებოდ მოემზადებიან. ქართველი ჯარისკაცები კონტრ-ტერორისტულ ოპერაციებს ავღანეთში, ამერიკელ სამხედრო მოსამსახურეებთან ერთად ჩაატარებენ. “ამერიკის შეერთებული შტატები მადლიერია, რომ საქართველოს არმია ავღანეთის უმნიშვნელოვანეს ოპერაციაში ნებაყოფლობით მონაწილეობს,”- ნათქვამია ამერიკის შეერთებული შტატების საელჩოს ოფიცალურ განცხადებაში. სამშვიდობო ოპერაციებში ქართველი სამხედროების მონაწილეობაზე საქართველოს თავდაცვის სამინისტროს პოზიცია ბოლო დღეების განმავლობაში არაერთხელ დაფიქსირდა, მათ შორის ისეთი მაღალი დონის შეხვედრებზე როგორიც ნატოს თავდაცვის მინისტერიალია. მინისტრ ბაჩო ახალაიას განცხადებით -“ქართული მხარე აცნობიერებს, რომ ISAF–ი არის ნატოს უმთავრესი პრიორიტეტი და ყველაზე რთული ოპერაცია ალიანსის ისტორიაში. ავღანეთში მშვიდობისა და სტაბილურობის დამკვიდრება ჩვენი საერთო ამოცანაა და შესაბამისად, უნდა გავაერთინოთ ჩვენი შესაძლებლობები ოპერაციის წარმატებით წარმართვისთვის”. დღეს ვაზიანის სამხედრო ბაზაზე სწავლება ოფიციალურად გაიხსნა. ცერემონიის ფარგლებში სამხედროებმა მოისმინეს საქართველოს და ამერიკის ჰიმნები და წუთიერი დუმილით პატივი მიაგეს გარდაცვლილ სამხედროებს. სწავლებაში მონაწილე ჯარისკაცები ქართველმა მართლმადიდებელმა მოძღვარმა და ამერიკელმა კაპელანმა დალოცეს.